Aaläss 2011

Es git au Aaläss näbde Fasnacht und die derf me au nit vergässe.
Au doderzue Föteli und Bricht:

Waagebau 2011

2011 isch s erschte Joor gsi, wo mer dr Waage komplet umbaut hän. Bis jetz simmer immer äntwäder mit emene gmoolte Waage oder mit emene Stroowaage uff dr Route gsi.
Mitem Sujet “S.H.I.T.” hämmer uns aber entschlosse dr Waage so umzbaue, dass er dernoo unsere “Radschütze Polizeipanzer” isch…

Läggerlibagge 2011

Au wenn miir s im Joor 2011 s erscht Mol gschafft hän, s Läggerlibagge bildlig z dokumäntiere – es isch bi wytem nit der erscht Läggerli-Samschtig in der Gschicht vo de JOKER WAGGIS gsi. Denn wenn miir ai Tradizioon hän, isch das wool s Härstelle vo unsere aigene Läggerli.

Doo derzue träffe miir uns alljeerlig zwai Wuche vor der Fasnacht in der Beggerei Bischoff. Deert produziere miir denn unseri ca. 2500 Läggerli, wo an der Fasnacht vom Waage verdailt wärde.

Banndaag 2011

Zum erschte Mol sinn miir JOKER WAGGIS im Joor 2011 als Glygge zämme an Muttenzer Banndaag gange.

In erschter Linie het dää Usflug derzue dient, grad no e glaini Glygge-Sitzig duurezfeire. Doch gliichzyttig isch e gmietlige Aalass druss entstande … e Aalass, wo s Ziig zur Tradizioon het.

Grillplausch 2011

Au disjoohr het unsere Grillplausch wider bim Patrick und em Mathias im Garte stattgfunde. Es isch e sone richtige gmiedliche Dag gsi womer händ zämme kenne verbringe.