Grindig
Im Oggtober 1996 hän sich e paar jungi Fasnachts-Verruggti gfunde, mit em Zyyl, gmainsam z Basel Fasnacht z mache. Innert kirzeschter Zyt isch e alte Ross-Dransporter uffdriibe woorde, wo me zämme zumene Waggiswaage umbaut het. So sin d JOKER WAGGIS am 17. Hoornig 1997 s erscht Mol an der Basler Fasnacht mitgfaare.

Us däm Grund zaigt unser Schild allewyyl „1997“ uff der lingge Sytte, nääbem aggtuelle Joorgang rächts. Drum het me sich schlussändlig derzue entschiide, s Joor 1997 als offiziells Grindigsjoor z iibernää.

Gschicht
Noch de erschte zwai Joor mit em Ross-Dransporter, het me sich fir d Fasnacht 1999 e greessere Waage bsoorgt – wo immerhin bis zur Fasnacht 2013 im Yysatz gsi isch! Im gliiche Joor isch d Mitgliiderzaal vo vier uff fimf erheet woorde. Ab der Fasnacht 2000 sin d JOKER WAGGIS denn zu säggst uff em Waage unterwäggs gsi.

So isch es e mänggs Joor bliibe. Doch fir d Fasnacht 2011 (im 15. Joor uff der Route) het me sich derzue entschlosse, d Mitgliiderzaal uff acht z erheehe.

Fir d Fasnacht 2014 het me sich denn wiider Mol ebbis glaischtet und e neye Waage zuegleegt. Und dää Waage isch bis hit im Yysatz.

Uff d Fasnacht 2015 het me d Mitgliiderzaal mit der Uffnaam vom niinte Mitgliid wyter erheet. Und syt der Fasnacht 2016 sin d JOKER WAGGIS jetz also zu zäänt uff em Waage …

Zyyl
Ai Zyyl vo de JOKER WAGGIS isch unter anderem, Fasnacht mit Stil z mache. Denn schliesslig isch em Waggis syy „Uffgoob“ nit numme, zyyllos mit Orangsche und Räppli um sich z schiesse, sondern s Intrigiere. Bi uns het sich das so speziell uspräggt, dass ainzelni Mitgliider hit fascht komplett uff Räppli verzichte.

Aber nie verzichte wurde d JOKER WAGGIS uff die sälbergmachte Läggerli, wo syt der erschte Fasnacht jeedes Joor vom Waage verdailt wärde – das Marggezaiche vo de JOKER WAGGIS!

Wie me gseet, sin uns Tradizioone enorm wichtig – miir bliibe aber ainewääg offe fir Neys. Denn d Fasnacht darf und sell sich wyterentwiggle.

Nääbscht der Fasnacht, wänn miir au unter em Joor d Zämmegheerigkait zelebriere, drum git s unter anderem regelmässigi Sitzige und Aaläss – aber au spontaani Zämmedräffe iiber s ganze Joor verdailt.

Sprooch
Die offiziell Sprooch bi de JOKER WAGGIS isch Baseldütsch bzw. Baseldytsch. So stoot s in de Statute gschriibe und so wird s an der Fasnacht umgsetzt. Au unseri “Zeedel“ sin so verfasst.

Unseri Homepage isch ebefalls grundsätzlig in Baseldytsch ghalte, wobyy entschuldigt syg, wenn an der ainte oder andere Stell e weeneli Baseldütsch zem Vorschyyn kunnt …

Sujet
Als Sujet bezaichnet me s Motto vo der jewyylige Glygge, Gugge, Gruppe, usw. Der Fantasie sin derby (fascht) kaini Gränze gsetzt. Und s Hauptzyyl vo de JOKER WAGGIS doo derby isch, e Sujet uszspiile, wo meegligscht kaini oder wenig anderi hän. Das isch in de vergangene Joor doch meermols glunge …

Zeedel
Der Zeedel wird jedes Joor ney gstaltet und dichtet – allewyyl passend zem aggtuelle Sujet. Die maischte Zeedel kemme in Väärsform derhär, ainigi (leider als wie weniger) mit eme Helge illuschtriert.
Der Helge isch maischtens e handgmoolts Bild, wo uff ai Bligg der Täggscht vom Zeedel unterstryycht bzw. ergänzt. D JOKER WAGGIS hän doo derfir e Kinschtler in de aigene Raihe.

Fir Uswäärtigi
S Baseldytsch und der Basler Humor sin amme bitz schwäär verständlig. Bi Unverständnis oder Frooge darf me sich drum gärn mit uns in Verbindig setze …