Aaläss 2012

Es git au Aaläss näbde Fasnacht und die derf me au nit vergässe.
Au doderzue Föteli und Bricht:

Waagebau 2012

In däm Joor hän miir zem erschte Mol iiberhaupt e Waage mit eme fixe Dach gha.Die bsunder Uusefoorderig isch doo derby gsi, dass der oberscht Dail het miesse abnäämbar bliibe. Will d Garage-Usfaart numme 3.20m hoch isch, und der Waage am Schluss ca. 3.80m gmässe het, hän miir am Samschtig vor der Fasnacht nomol alles miesse gää, bis der Waage ändlig us der Garage dusse gsi isch.

Aber wie me unter „Fasnacht 2012“ gsee ka, het alles yywandfrey klappt …
Läggerlibagge 2012
Kurz vor em Mittag isch es los gange mit Läggerlibagge in der Baggstuube vo der Beggerei Bischoff – und uuse koo sin miir erscht, wo s dusse scho dunggel gsi isch.
Doch hauptsach s’Daageszyyl isch erraicht worde – unseri ca. 2500 Läggerli hän miir bagge und zuegschnitte. Allerdings sin fir s Yypagge no wyteri 2 Wuche neetig gsi. Aber rächtzyttig zur Fasnacht sin au die Letschte yypaggt gsi.
Voorfasnacht 2012
Nadyrlig interessiere sich die maischte vo uns JOKER WAGGIS au fir anderi Fasnachte. Ganz hoch im Kurs stoot doo derby jeedes Joor au d Rynacher Fasnacht.
Am Sunntig vor em Moorgestraich geen denn ainigi vo uns tradizioonell an d Prattler Fasnacht. Vo deert us goot s allewyyl diräggt in d Stadt, wo miir am Baanhof no die aint oder ander Hampfle Blaggedde verkaufe mien, bevor miir der Moorgestraich kenne gniesse.
Bummel 2012
Nach der Fasnacht 2012 isch der erscht richtig Jokerbummel organisiert worde.
Zwar sin miir scho frieneri Joor allewyyl am Oobe gmainsam die letschte Fasnachts-Deen in der Innerstadt go gniesse, doch neu hän miir au am Nomidaag scho ebbis unternoo.
So hän miir uns um d Mittagszyt uff e Wäg nach Reigoldswil gmacht, wo s uff der Wasserfalle e glaine Apero gää het. Und aaschliessend isch es per Trottinett rasant bärgab gange. Am Oobe hän miir denn zämme z Basel d Fasnacht 2012 ändgiltig verabschiidet …
Grillplausch 2012
Der Grillplausch 2012 isch am Daag vo der Schwiizer Aidgenosseschaft – em 01. Auguscht – im Garte vom Galli iiber d Biini gange.
Mit Grill, Fuessball und eme aigene glaine Fyyrwärgg zem Abschluss, hän miir e gmietlige Daag im familiäre Raame verbrocht.