Aaläss 2013

Es git bi de JOKER WAGGIS au diväärsi Aaläss usserhalb vo der Fasnacht – die deerf me ganz glaar nit vergässe. Doo findsch Fetteli und Bricht derzue:

Waagebau 2013
In däm Joor isch unsere Waggiswaage als Mobils Asylhaim derhär koo. Will der Waage geegeniiber em Vorjoor fir aimol numme gringfiegig veränderet worde isch, het im Joorhundert-Winter 2012/2013 vor allem s Waagemoole Soorge beraitet. Denn bi -20 Grad an gwisse Dääg, isch d Faarb reegelrächt am Pinsel aagfroore!
Doch mit Sonderschichte und Haizstraaler het zem Schluss no alles glängt bis zur Fasnacht …
Waage Yyweihig 2013
Am Samschtig vor der Fasnacht 2013 het nach all dääne Joor zum erschte Mol e offizielli Waage Yyweihig stattgfunde!
 
An däm Daag wird tradizioonell unsere Draggdoor ghoolt und verschaalt. Und am Waage wird no der letscht Schliff gmacht. Duur d Waage Yyweihig hän d JOKER WAGGIS aber e weeneli speditiver miesse ans Wärgg go, dermit alles zur rächte zyt parat gsi isch.
Doch alles het passt und so hän miir gmainsam mit Frinde, Familie, Passiv-Mitgliider und de Uelischränzer deerfe uff e Waage 2013 aastosse.
 
Als spezielle Heehepunggt hän alli Aawääsende bim allerletschte Handgriff am Waage no „miesse“ mithälfe. D Uffgoob isch aifach gsi; der Waage verunstalte. Und wie me gseet, e machbari Uffgoob …
Näbem Cortege 13
Vor, wäärend oder nach em Cortège git s immer wiider Mol e Meegligkait, mit de JOKER WAGGIS aazstosse oder e Schwätzli z halte.
Doo derbyy entsteen denn die nit ganz offizielle Fetteli …
Joker Binggis 2013
Der Zyschtig Nomidaag gheert tradizioonell der Glainschte. So sin au d JOKER WAGGIS wiider mit de Binggis duur d Stadt zooge.
Ab de drey am Noomidaag goot s allewyyl loos, bis d Binggis „usgschosse“ sin …
Zyschdig Oobe 2013
Am Zyschtig Oobe nach der Binggis-Fasnacht isch es zur Tradizioon worde, gmainsam am Rümelinsplatz Znacht z ässe. Als Neyling het der Michi in däm Joor die eerevoll Uffgoob bikoo, uns z bekoche. Er het fir uns Chili kocht und es isch verdammi guet gsi – so verwunderet s nit, dass er syt däm Daag zum Glygge-Koch vo de JOKER WAGGIS erkoore worde isch.
 
Nach em Ässe het s uns denn wiider zur Draischiibe hinter em PickWick-Pub zooge, wo syt ainige Joor d Birsig-Sinfonie stattfindet – e glains aber guets Guggekonzäärt. Deert isch denn au unser Bar-Wäägeli wiider zem Yysatz koo …
Muttenzer Schlussstraich 2013
Am Samschtig nach der Basler Fasnacht isch fir d JOKER WAGGIS nomol e grossi Sach. Denn findet nämlig der Muttenzer Schlussstraich statt.
Syt ainige Joor lauffe au miir deert aggtiv mit unsere Binggis und em Binggis-Wäägeli mit. Und an unserer Bar im neye Partyzält het me bis spoot in d Nacht ebbis z Ässe und z Dringge griegt. Bi -7 Grad sin vor allem Warmgedrängg seer beliebt gsi …
Bummel 2013
Zem Abschluss vom Fasnachts-Joor 2013 isch no der Jokerbummel aagstande.
Unter em Motto „365 Dääg bange“ het am Wettstaiplatz – genau deert wo 365 Dääg speeter der Cortège fir uns starte duet – e glaine Apero stattgfunde. Dernoch het e Fierig duur d Papiermyyli uff uns gwartet, wo miir au sälber hän kenne Papier härstelle.
Nach em speetere Fuessball-Spiel FCB – YB isch me no gmainsam in d Stadt zem die letschte Fasnachs-Deen z gniesse …
Banndaag 2013
Allewyyl am Uffaarts-Donnschtig findet der Muttenzer Banndaag uff em Sulzkopf statt – und syt e paar Joor nutze d JOKER WAGGIS dää Daag, zem s neue Fasnachts-Joor z ereffne.
Im 2013 isch es zuedäm speziell gsi fir uns, het doch der Patrick – unsere langjeerige Oobmaa – nach der Fasnacht 2013 syy Usdritt bi de JOKER WAGGIS gää. An däm Daag isch er nomol mit uns uff e Sulzkopf koo, wo mir uns mit eme Abschiidsgschängg bi ihm für die ganze Joor bedanggt hän.
Wie me gseet, isch d’Iiberraschig glunge …
Grillplausch 2013

Ebefalls im Summer 2013 hän miir s erscht Mol unsere Grillplausch im greessere Raame organisiert. Nimm im Garte vo ainzelne Glygge-Mitgliider, sondern e weeneli abglääge uff der Muttenzer Rütihard – also gnueg wyt wäg, dermit niemer gsteert isch.

Durch unser eigenes Zällt isch uns an däm Daag au sWätter zimmlig egal gsi. So isch eme gmietlige Zämmesyy mit unsere Frinde, Familie und Passiv-Mitgliider bis wyt nach Mitternacht nit mee im Wäg gstande …

Basler Tattoo 2013

Im Summer 2013 hän d JOKER WAGGIS d Meegligkait gha, d Basler Källerwäntele Zunft an iirem Verkaufsstand am Basel Tattoo z unterstitze. Mit grossem Yysatz aber au gliich vyyl Spass hän miir deertmols gmainsam e Rekordumsatz erzyylt.

Fir unseri Glygge isch das us zwaifacher Sicht e Gwinn gsi. Ainersyts het me sich kenne der Effentligkait präsentiere, anderersyts isch e scheene Batze in d Kasse koo, wo schlussändlig d Finanzierig vom lang erseente neye Waagiswaage gsicheret het.