Aaläss 2016

Es git bi de JOKER WAGGIS au diväärsi Aaläss usserhalb vo der Fasnacht – die deerf me ganz glaar nit vergässe. Doo findsch Fetteli und Bricht derzue:

Läggerlibagge 2016

Allewyyl zwai Wuche vor der Fasnacht stoot bi de JOKER WAGGIS der tradizioonell Läggerli-Samschtig aa. So isch das nadyrlig au vor der Fasnacht 2016 gsi.

Und au in däm Joor hän miir wiider zwische 2500 – 3000 Läggerli produziert, wo denn an der Fasnacht vom Waggiswaage verdailt worde sinn.

Waage Yyweihig 2016

Au in däm Joor het am Samschtig vor der Basler Fasnacht wiider unseri Waage Yyweihig stattgfunde.

Doch au in däm Joor het uns der Petrus wiider emol nit grad mit Draumwätter verweent. Trotzdäm hän sich ainigi Frinde, Verwandti, Bekannti und Passiv-Mitgliider in Birsfälde yygfunde, zem uff unsere Waage aastoosse.

Alles in allem isch es esoo doch zum ene gmietlige Noomidaag worde; das nit z letscht, dangg em Ufftritt vo der Guggemuusig Fährischiffli, wo fir Stimmig gsoorgt het. Und so isch au der Rääge bald emol vergässe gsi …

Muttenzer Füürsunntig 2016

Vor eme Joor hän d JOKER WAGGIS versuechswyys e erschts Mol au am Muttenzer Füürsunntig d Door vo der JOKER BAR geffnet. Und der Erfolg het uns rächt gää – isch doch s Zält bis nach Mitternacht maischtens guet gfillt gsi.

So isch schnäll klar gsi, dass miir au an der Fasnacht 2016 wiider am Füürsunntig und am Schlussstraich mit der JOKER BAR in Muttenz aawääsend syy wärde …

Muttenzer Schlussstraich 2016

Mit em Wäggsel vo der JOKER BAR an neue Standort vor der Dorfkirche, hän d JOKER WAGGIS am Schlussstraich 2015 no e wyteri Veränderig duuregmacht. Und denn isch me au zem erschte Mol mit em groosse Waage am Umzug mitgfaare.

Ai Joor speeter hän miir das Ganze wiiderhoolt. Nit numme fir d JOKER WAGGIS isch es zur Erfolgsgschicht worde, au fir d Muttenzer Fasnacht isch es e Uffwäärtig gsi …

Bummel 2016

Wie allewyyl am dritte Bummel-Sunntig, het am 06. Meerz 2016 unsere Jokerbummel stattgfunde.
Unter em Motto „Achtig Gfoor (AG)“ isch es – wie s scho vermuete lost – ins „Niemandsland“ zwische Basel und Ziiri gange; in Kanton Aargau.
Nach ere kurze Faart isch me in Muri AG e bekannte Härsteller vo Verkeersschilder go besichtige. Nach em Mittagässe isch es denn am Noomidaag wyter nach Gösge gange, wo me im Kärnkraftwärgg het kenne e Fierig gniesse.
Us Sicherhaitsgrind isch s Fottigrafiere laider nit erlaubt gsi.
Geege Oobe zrugg in Basel, hän gwissi JOKER no die letschte Fasnachts-Deen in der Innerstadt gnosse …

Banndaag 2016

Tradizioonell ziet s uns JOKER WAGGIS am Uffaarts-Donnschtig syt vyyle Joor zem Sulzkopf – deert wo an däm Daag allewyyl der Muttenzer Banndaag stattfindet.

Mit ere rekoordverdächtige Aazaal JOKER, Frinde oder Passiv-Mitgliider, het me sich scho am Vormittag uff e Wäg gmacht. Bi däm Draumwätter isch eme gmietlige Nomidaag in der Natur nadyrlig nyt im Wäg gstande. Und esoo erstuunt s au nit, dass sich gwissi vo uns erscht kurz vor Mitternacht uff e (dunggle) Haimwäg gmacht hän …

Grillplausch 2016

Im Auguscht 2016 het wiider unsere tradizioonelle Grillplausch stattgfunde. Im Jubiläums-Fasnachts-Joor isch dää fir aimol als e Art “Wägbeglaiter-Fescht“ iiber d Biini gange. Alli Frinde, Familie und Passiv-Mitgliider sinn doo derzue wiider härzlig yyglaade gsi.

Als Dangg fir die joorelang Unterstitzig isch fir s lyyblige Wool uff jeede Fall gsoorgt gsi. So het s Fleisch und Wirscht “en masse“ gha. Und als speziells Highlight isch e Smoker organisiert worde, wo me dermit perfäggt gaarti SpareRibs het kenne aabiete.

Fir die Aawääsende isch es e gladdi Sach gsi. Und drum wird au in eme Joor sicher wiider e Grillplausch uff d Bai gstellt …