Aaläss 2018

Es git bi de JOKER WAGGIS au diväärsi Aaläss usserhalb vo der Fasnacht – die deerf me ganz glaar nit vergässe. Doo findsch Fetteli und Bricht derzue:

Läggerlibagge 2018

Dass miir uns zwai Wuche vor der Basler Fasnacht alljeerlig zem Läggerlibagge yyfinde, diirft de Kenner vo de JOKER WAGGIS nit fremd syy. Und ainewääg isch es in däm Joor e weeneli andersch gsi. Im Vorfäld zum Läggerli-Samschtig hän miir uns nämlig vorgnoo, der ganz Prozäss vom Bagge iiber s’Schniide bis hii zum Yypagge, am gliiche Daag z’schaffe.

Und daatsächlig – nach insgsamt “numme“ 13 Stunde in zwai Schichte mit Volldampf am Wärgg, isch s’Zyyl erraicht gsi …

Joker Binggis 2018

Der Zyschtig-Nomidaag gheert de Binggis! Esoo isch es in Basel – und esoo isch es au bi de JOKER WAGGIS.

Us däm Grund sinn miir au am Fasnachts-Zyschtig 2018 wiider mit em Binggis-Wäägeli und acht Binggis d’Innerstadt go unsicher mache …

Muttenzer Schlussstraich 2018

Nach ere usserordentlig erfolgriiche aber au aasträngende Basler Fasnacht, het me sich bi de JOKER WAGGIS nit welle lumpe loo und het fir e Muttenzer Schlussstraich nomol alles gää.

Mit em Waage und ere rekoordverdächtige Aazaal Binggis, aber au mit der JOKER BAR het me d’Muttenzer Fasnacht aimol mee beriicheret.

Garage Bar Oobe 2018

Zum zwaite Mol het’s am 28. Septämber 2018 ghaisse: Cooli Muusig, gueti Dringgs und glaini Snacks!

Und au in däm Joor isch unsere Garage Bar Oobe dangg de zaalryche Bsuecher wiider e volle Erfolg gsi. Mit em Heehepunggt der spontaan Uffdritt vo der Guggemuusig Claraschnoogge …

Bummel 2018

Unsere Jokerbummel het in däm Joor am 11. Meerz 2018 stattgfunde.

In erschter Linie wäge der Gsundhait vo der Hälfti vo de Bedailigte, aber schlussändlig au wägem Räägewätter, het dää numme in verkirzter Form kenne duuregfiert wärde.

Der Träffpunggt isch drum erscht Mitti Noomidaag bim Birskepfli gsi. Mit em Rhytaxi isch es denn iiber Wasser aimol gweer duur Basel gange. E passende Ort fir der aint oder ander Dringg.

Nach em Nachtässe het me denn no gmainsam die letschte Fasnachts-Deen in der Innerstadt gnosse … 

Banndaag 2018

S’isch wiider Uffaarts-Donnschtig gsi, der Muttenzer Banndaag isch uff em Programm gstande – und d’JOKER WAGGIS sinn wie allewyyl voll derby gsi.

Au wenn s’Wätter in däm Joor nit grad frindlig gsi isch, het me’s gmainsam doch gnosse und isch erscht mit de Letschte wiider vom Sulzkopf ins Dorf gloffe …

Waagebau 2018

Fir d Fasnacht 2018 hän miir der Fokus e weeneli mee uff e Waage gleegt. Au wenn der Waage uff e erschte Bligg gar nit esoo speggtakulär usgsee het, sinn uff e Zwaite doch ainigi Details z entdegge gsi. Entsprächend zytintensiv het sich der Waagebau denn au uusegstellt.

Der ganz Uffwand het sich aber gloont. Denn uff die erscht Nominazioon fir “s goldige Räppli“ und letschtändlig der Waal zum viertbeschte Waage vo der Basler Fasnacht 2018, ka me scho stolz syy …