Aaläss 2015

Es git bi de JOKER WAGGIS au diväärsi Aaläss usserhalb vo der Fasnacht – die deerf me ganz glaar nit vergässe. Doo findsch Fetteli und Bricht derzue:

Schlittelweekend 2015
Schlittelweekend 2015
Im Herbscht 2014 isch uff aimol d Ydee vomene Schlittelweekend uffkoo.
Und nadyrlig sin d JOKER WAGGIS – wo allewyyl fir jeede Spass z ha sin – sofoort Fyyr und Flamme gsi.
Schnäll isch alles organisiert gsi. Und am Wuchenänd vom 10./11. Jänner 2015 isch es denn Richtig Bergün gange. Der Schnee isch an däm vorzoogene Frieligs-Wuchenänd zwar nit optimaal gsi, aber em Spass het das nit gschaadet ….
Waagebau 2015
Waagebau 2015
Der Bau vom Waggiswaage fir d Fasnacht 2015 isch e relativ glaine Uffwand gsi, het er doch vorwiegend us Moole bestande.
 
Doch langwiilig isch es ainewääg nit worde. Denn schliesslig hän miir uff die Fasnacht e neue Draggdoor zur Verfiegig gha, und derfir het e komplett neui Draggdoor-Verschaalig aane miesse.
 
Gliichzyttig hän mir au no unser alts Bar-Wäägeli verschrottet und ebefalls e greessers Neus zämmebaschtlet.
 
Wie me gseet, Zyt zem Verschnuufe git s sälte bi de JOKER WAGGIS …
Läggerlibagge 2015
Läggerlibagge 2015
Au zwai Wuche vor der Fasnacht 2015 het wiider unsere jeerlige „Läggerli-Samschtig“ stattgfunde.
 
Wäärend iiber säggs Stunde hän miir die verschiidene Zuedaate zumene Daig vermänggt, dää usgwaallt, uff Baggblääch verdailt, bagge, glasiert, zuegschnitte … und dernoch, meereri Dääg lang, jeedes vo de so entstandene 2500 – 3000 Läggerli ainzel in Plastigg verpaggt.
 
Nadyrlig e riise Aarbet – doch d Tradizioon isch es uns wärt!
Waage Yyweihig 2015
Waage Yyweihig 2015
Am Samschtig vor der Basler Fasnacht het au im Joor 2015 nadyrlig wiider unseri Waage Yyweihig stattgfunde.
 
Trotz em miserable Wätter – s het praggtisch der ganz Daag gschifft – hän sich ainigi Frinde, Verwandti, Bekannti und Passiv-Mitgliider in Birsfälde yygfunde. Und die sin beloont worde, denn nääbem tradizioonelle Ufftritt vo de Uelischränzer, hän uns in däm Joor au d Fährischiffli bsuecht und ebefalls e paar Stiggli zem beschte gää.
 
Bi däm Programm und unserem Zält, isch au der Rääge bald emol vergässe gsi und es isch doch no e gmietlige Nomidaag worde.
Muttenzer Füürsunntig 2015
Muttenzer Füürsunntig 2015
Am Füürsunntig findet – wie s der Name scho sait – in Muttenz der tradizioonell Faggelzug vom Wartebärg ins Dorf statt.
 
Und zem erschte Mol hän d JOKER WAGGIS im däm Joor scho am Muttenzer Füürsunntig d Door vo der JOKER BAR geffnet.
Am neue Standort diräggt vor der Dorfkirche isch ainiges los gsi, so hän miir vor luter Schaffe s Fotigrafiere derby praggtisch vergässe …
Muttenzer Schlussstraich 2015
Muttenzer Schlussstraich 2015
Nachdäm miir am neue Standort vor der Dorfkirche am Füürsunntig scho e erschte Yydrugg griegt hän, isch d Motivazioon fir e Schlussstraich nadyrlig riisig gsi. Und miir sin nit entdischt worde, denn praggtisch vom Aafang bis zum Schluss isch in der JOKER BAR der Deifel los gsi.
 
Aber nääbem Standort vo der JOKER BAR het s im däm Joor no e wyteri Neuerig gää; denn zem erschte Mol sin d JOKER WAGGIS mit em groosse Waage am Umzug mitgfaare … und woorschyyns nit zem letschte Mol …
Bummel 2015
Bummel 2015
Au im Fasnachts-Joor 2015 het er wiider am dritte Bummel-Sunntig stattgfunde: Unsere Jokerbummel.
Unter em Motto „Miir saue“ hän miir uns beraits am Vormittag in Lieschtel zum professionelle Fotti-Shooting troffe. Wiider zrugg in Basel, het – nach eme usgiibige Mittagässe – e multimediali Schnitzeljagd stattgfunde, wo uns an bedytendi Plätz vo Basel, der Fasnacht, oder de JOKER WAGGIS gfiert het.
Nach eme gmainsame Apero mit Familie, Frinde und Passiv-Mitgliider, hän mir no die letschte Fasnachts-Deen in der Innerstadt gnosse …
Banndaag 2015
Banndaag 2015
Au am Uffaarts-Donnschtig 2015 hän sich d JOKER WAGGIS wiider uff e Wäg zem Sulzkopf gmacht, wo alljeerlig der Muttenzer Banndaag stattfindet.
 
Fir unseri Glygge bedytet dää Daag syt ainige Joor s erschte offizielle Zämmeträffe im neue Fasnachts-Joor. Und gmainsam mit Familie, Frinde, Passiv-Mitgliider, etc. verbringt me allewyyl e gmietlige Nomidaag in der Natur …
Garage Sanierig 2015
Garage Sanierig 2015
Syt ainige Joor findet allewyyl im Frielig unsere Garage-Daag statt. Was in de vergangene 12 Monet an Abfall aagfalle isch, muess schliesslig au emol entsoorgt wärde, dermit alles parat isch fir e neue Waagebau.
 
Will unseri in d Joor grooteni Garage als wie mee Pflääg bruucht, hän miir in däm Joor e greesseri Sanierig in Aagriff gno. Inne hän miir ainiges umgstellt und bis in letschte Egge alles uuseputzt. Und zem erschte Mol hän miir uns au uff s Dach gwoogt und hän däm e neue Aastrich verpasst.