Aaläss 2014

Es git bi de JOKER WAGGIS au diväärsi Aaläss usserhalb vo der Fasnacht – die deerf me ganz glaar nit vergässe. Doo findsch Fetteli und Bricht derzue:

Waagebau 2014
Waagebau 2014

Im Summer 2014 isch es ändlig sowyt gsi – d JOKER WAGGIS hän sich e neye Waage kauft.

Nachdäm miir syt der Fasnacht 2011 d Mitgliiderzaal uff acht erheet hän, isch der Platz uff em alte Waage scho seer beschränggt gsi. Es het also e neye Waage und e neys Konzäpt aane miesse – denn wär uns kennt dää waiss, dass miir der diräggt Kontaggt zem Publikum am Stroosserand sueche. Fir e neye Waage isch also vo Aafang aa glaar gsi: Dää muess geege d Sytte offe syy!

Es het zwar e mänggi Stund fir e Waagebau miesse gopferet wärde, doch wie me gseet, het sich s gloont …
Läggerlibagge 2014
Läggerlibagge 2014

Zwai Wuche vor der Basler Fasnacht findet tradizioonell unsere “Läggerli-Samschtig“ statt – dää Daag, wo allewyyl unseri sälbergmachte Läggerli entsteen. So isch das au in der Vorfasnachtszyt 2014 gsi.Wobyy, e glaine Tradizioonsbruch het s denn doch gää – zem erschte Mol sin d Läggerli vo de JOKER WAGGIS nit dreyeggig, sondern viereggig derhär koo.

Em Gschmagg het s uff jeede Fall nit gschaadet!

An dääre Stell wiider Mol e diggs Danggscheen an d Beggerei Bischoff, alle voraa der Werner, wo uns jeedes Joor mit Root und Daat zur Sytte stoot! Dangge!
Waage Yyweihig 2014
Waage Yyweihig 2014
Au im Vorfäld zur Fasnacht 2014 het s wiider e Waage Yyweihig gää. Ab de vieri am Nomidaag isch unsere neye Waggiswaage zem allererschte Mol de Familie, Frinde und Passiv-Mitgliider präsentiert worde. Voller Stolz hän d JOKER WAGGIS zur Besichtigung und aaschliessendem Apero mit Grill yyglaade. Und au d Uelischränzer sin wiider gärn verby koo, zem e Ständeli fir uns z spiile.
Alles in allem e glungene Nomidaag und e vyylversprächende Ufftaggt zur Fasnacht 2014 …
Muttenzer Schlussstraich 2014
Muttenzer Schlussstraich 2014

Syt ainige Joor goot d Fasnacht fir d JOKER WAGGIS nach de drey scheenschte Dääg no e weeneli wyter. D Muttenzer Fasnacht isch fir uns nomol e letschte Heehepunggt, bevor s Fasnachts-Joor langsam z Änd goot.
Au im 2014 sin d JOKER WAGGIS wiider mit em Binggis-Wäägeli uff der Route duur Muttenz aazdräffe gsi. Und nadyrlig het me au wiider der aint oder ander Dringg an unserer JOKER BAR vor der Beggerei Bischoff kenne nää …
Bummel 2014
Bummel 2014
Der Jokerbummel – der letscht offiziell Aggt vom jewyylige Fasnachts-Joor – isch im däm Joor unter em Motto „Miir dräffe sii“ gstande!
Los gange isch es beraits am Vormittag, wo miir uns zämme uff e Wäg nach Liesbärg zem Paintball spiile gmacht hän. Geege Oobe isch es denn wiider zrugg in d Stadt gange, wo miir uns nach eme gmietlige Ässe mit ainige Passiv-Mitgliider droffe hän. Nach ere Fierig duur d Färnsee-Studios vom teleBasel, het me gmainsam no die letschte Fasnachts-Deen gnosse …
Kick'n'Grill 2014
Kick'n'Grill 2014
Kick’n’Grill het e neye Aalass ghaisse, wo am 08. Juni 2014 zem erschte Mol stattgfunde het. Will der Termin vom Glygge-Grimpeli de maischte vo uns nie passt het, hän miir unsere aigene Fuessball-Nomidaag mit Frinde, Familie und Passiv-Mitgliider organisiert.
Aber im Stil vo de JOKER WAGGIS nadyrlig nit ooni gmeitligem Zämmesyy dernoch …
Grillplausch 2014
Grillplausch 2014

Der Grillplausch 2014 het wiider uff der Muttenzer Rütihard stattgfunde. Laider het s der Petrus in däm Joor nit guet gmaint mit de JOKER WAGGIS, denn wie praggtisch der ganz Summer, het s au an däm Daag zem greeschte Dail gräägnet. Drum hän wool au numme wenig vo unsere Frinde, Familie und Passiv-Mitgliider der Wäg uff sich gno.

Dangg unserem Zält und eme bitz iiberdriibe grosse Fyyr, isch es drotzdäm e „fiechtfreeligi“ Sach worde …
Hochzyt vo dr Evy und em Beni 2014
Hochzyt vo dr Evy und em Beni 2014
Syt der Fasnacht 2006 isch der Beni bi de JOKER WAGGIS – und am 29. Auguscht 2014 hän miir dää Bursch ändlig unter d’Huube brocht!
Im Schloss Hallwyl hän sich d Evy und er s Joo-Wort gää. Fascht (aber numme fascht) hätte miir dää wichtig Schritt im Lääbe vo dääne zwai verpasst, sin miir doch iiber e Stund im Stau gstande.
Doch zem Gligg het s grad no glängt und mir hän mit de frisch Vermäälte e tolle Daag und Oobe deerfe verbringe.
 
Miir winsche dr Evy und em Beni an dääre Stell nomol alles Gueti …