Nadyrlig wänn miir im Jubiläums-Joor die wool längscht Tradizioon vo de JOKER WAGGIS nit vernoochlässige, so het au in däm Joor zwai Wuche vor der Fasnacht wiider unsere Läggerli-Samschtig stattgfunde.

In no sälte erlääbter Gschwindigkait sinn die ca. 2500 Läggerli produziert worde, wo denn an der Fasnacht 2017 unter s’Volgg brocht wärde ...

Am Samschtig vor der Basler Fasnacht 2017 isch es sowyt gsi – der Jubiläums-Waage isch yygweiht worde.

Doch in däm Joor het’s no ebbis anders zem Yyweihe gää, hän miir doch nääbscht em Waagebau au unseri Garage grossflächig renoviert.

Mit der neu entstandene Lounge und der derzue gheerige Bar, het esoo die bishär greescht Waage Yyweihig in der Gschicht vo de JOKER WAGGIS kenne stattfinde.

Bi so vyyl Protz hän miir uns denn au nit welle lumpe loo. Drum isch nääbe de zwai Guggemuusige Nuggi-Spugger und Fährischiffli, mit de Glunggi sogar e Dambuure-Gruppe vor Ort gsi, wo dää Aalass muusikalisch unterstitzt het.

An dääre Stell nomol e riise Danggscheen an alli Bedailigte. Und au nomol härzlige Gliggwunsch an d’Nuggi-Spugger, wo im 2017 ebefalls jubiliert hän.

Syt ainige Joor zien d’JOKER WAGGIS am Zyschtig Nomidaag allewyyl mit em Binggis-Wäägeli und de Binggis duur d’Innerstadt. Grundsätzlig meerhaitlig im Grossbasel, hän miir d’Zyschtigsroute fir aimol ins Glaibasel verlängeret – het doch am speetere Nomidaag am Mässplatz der Jubiläums-Apero vo de Nuggi-Spugger stattgfunde.

Im säggste Joor mache d’JOKER WAGGIS jetz scho zämme mit de Binggis am Muttenzer Schlussstraich mit. Doch so Wätter, wie miir‘s im 2017 verwitscht hän, isch wool aimolig gsi. Glaar sin d’Lyt in Schaare in Dorfkärn zooge, zem der Umzug gniesse.

Sogar no länger isch d’JOKER BAR vor Ort derby. Und syt miir der Standort vor der Dorfkirche bezooge hän, isch unser Partyzält e Garant fir gueti Dringgs, die beschte HotDogs und groossartigi Stimmig worde. Esoo erstuunt’s wenig, dass miir wiider emol die letschte gsi sin rund um e Dorfplatz, wo offe gha hän!

Also, uff was wartsch?! Kumm au Du an der näggschte Fasnacht (wiider) bi uns verby …

Tradizioonell findet am Uffaarts-Donnschtig der Muttenzer Banndaag uff em Sulzkopf statt. Und d’JOKER WAGGIS sinn doo aigentlig syt Joore intensiv derby … es sig denn, der Schwiizer Fuessball-Verband setzt der Cupfinal genau am gliiche Daag aa!
Esoo isch d’Delegazioon rund um d‘JOKER WAGGIS fir aimol an ainer Hand ablääsbar gsi. Ainewääg isch es ganz e luschtige Noomidaag worde.

Fir der aint isch es e gmietlige Oobe, fir der ander e kulinarischi Wältrais und e Dritte iebt sich lieber im Raasemaihe, Fir alli andere isch es aifach der alljeerlig Grillplausch vo de JOKER WAGGIS.

Genau dää het im Auguscht 2017 wiider stattgfunde. Wie me gseet, im glaine aber stimmigsvolle Raame mit unsere treuschte vo de treue Passiv-Mitgliider. Und nadyrlig mit uns JOKER …

Cooli Muusig, gueti Dringgs und glaini Snacks – derzue e gueti Stimmig! Esoo hän miir JOKER WAGGIS uns der Garage-Bar-Oobe vorgstellt, wo am 29. Septämber 2017 zem erschte Mol iiber d’Biini gange isch.
Und dangg Euch isch dää Aalass genau dää Erfolg worde, wo miir uns gwinscht hän. Es diirft also e Wiiderhoolig gää im näggschte Joor …